Dann douzyèm boute nou la vi lory joseph la éspédyé Furcy dann lil Maurice dsi in propriyété li l’avé pou fé travaye lo ga konm zésklav plantassion. Dir pou in moune l’avé travaye konm mète d’otèl d’alé travaye dann kann avèk toute lo mové trètman kou d’shabouk komandèr téi done banna dsou lé z’ord la bèl sèr d’Lory k’téi diriz lo plantassion laba dann lil Maurice — lo péi l’avé roprann son nom dann tan bann olandé dopi Langlétèr l’avé kapar lil de franss. Sa téi éspass l’ané 1815 sanm pou mwin apré la défète Napoléon promyé..

Mé Lory la fé in lérèr pars dann toute zafèr wi fé vite lé riskab wi fé in l’érèr é lory la fé inn : li la obliye déklar an douane laba Maurice la prézanss Furcy konm zésklav kan sète-la lété éksfiltré dopi la jol dann Bourbon ziska nout voizine. Donk pa d’ prèv ké Furcy lété zésklav dann bann dokiman lo bato konm dann bann dokiman la douane. Wala in lérèr noré gingn bénéfissyé Furcy mé li la mète lo tan pou li réazi par mank de konéssanss.

Tardra viendra, sa l’ariv l’ané 1829 kan langlétèr la anvoye in mission lil Maurice pou prépar l’abolission lésklavaz. Lo bann zékspèr la fé in lankète partou dsi bann zésklav é zot la mète la min dsi lo lirégilarité.. Pa d’dokiman pou prouv Furcy té zésklav donk si na pwin d’prèv de sa lo ga té lib é té i falé libèr ali. Sé konmsa ké furcy la rotrouv ali om lib lontan apré, lé vré, mé kant mèm li la fini par ète lib dann lil Maurice.

I fo dir ossi laba dann lil Maurice lété pa konm Bourbon l’avé in sossyété téi pran la défanss bann zésklav é an parmi l’avé in prète téi koné bien lo prokirèr Boucher-zot l’avé fé zétide ansanm — é Furcy l’avé gingn aprosh ali in dimansh apré la mèss bann zésklav é l’abé Déroulède lété in vré zami bann zésklav é sé li k’va bien ède Furcy dann la suite lo zistoir. An mèm tan lo labé lété dann mouvman franmasson laba dan Maurice apré fé lo forssing pou labolission.

Donk lo bann zékspèr zanglé la désside téi falé libèr Furcy mé si dann in promyé tan Furcy lété zésklav bitassion, dann in dézyèm tan li té konfitiryé dsi la propriyété Lory é sé li téi ède kont in moné lo bitassion rofé son rossours momandoné té bien ba. Donk Furcy la gingn lo tan bien aprann son métyé é s é par sa li la gingn lanss ali dann lé zafèr… Donk listoir la pankor fini é nou néna ankor dé shoz pou oir dann la vi marmaye-la.A bon antandèr salu !

Justin