Constance l’avé parti oir bann zom de loi é sak té onète l’avé di avèk èl : konm Madeleine lété afranshi dopi l’ané 1789, él i dové d’ète lib dopi son lakt lafranshisman, mé konm èl lé mor ésklav l’ané 1815 donk son propriyétèr téi doi pèye domaz dsi disnèf z’ané, sak i fé inbon moné a tou lé kou.

Or joseph lory li ossi l’avé pran son ransègnman é kan li la bite avèk Constance li la di : si wi dispanss amwin pèye lo disnèvan lindamnité par rapor sak mon famiye i doi pou oute momon mi pran langazman libèr Furcy d’issi dé zané an pliss done ali kalt mil fran pou rolanss ali dan la vi.

Constance la bien ékoute ali mé li la di dann son kèr : madam Routier la rakonte mantèr vi k’èl la pa libèr Madeleine, Parèye pou méssyé lory donk sak li di sé sirman in zistoir mantèr donk i fo alé an prossé pou Furcy pars konm Furcy léné l’ané 1786 é son momon té lib lané 1789 Furcy galman téi doi d’ète lib.

Constance avèk Furcy la pran ransègnman avèk lo prokirèr Boucher épi son sibtitu Jacques Sully — Brunet pars zot l’avé dépoz in gro dossyé tribinal é bann majistra l’avé lir é zot lété sirésèrtin Furcy té i doi ète lib… Constance avèk Furcy lété bien déssidé mé po d’tèr kont po d’fèr toute so moune-la té i koné pa la fors lo kan ligué kont zot.

A bon antandèr salu !

Justin