Lé sinp : nou lé dann la dépandanss pou apépré tout sak nou la bézwin é ni pé dir san égzazéré sé la métropol k’i foute anou dann in sityassion konmsa… Nou na pwin lotonomi alimantèr, nou na pwin lotonomi énèrzétik, parl pi la dépandanss dann médikaman. Si i kontinyé konmsa nou lé kwinssé san pour san.

Atansyon ! In pé va di sak ni risk sé solman la goumantassion bann pri. La vi shèr ni koné é sar plizanpli shèr donk sé ankor bann pov k’va prann lo shok é sak néna moiyin d’moiyéné biensir zot porte-fèye sar pli plate mé sé solman in mové moman pou passé.

Alon pa koz konmsa. Alon dir anou si toute bann voi komèrssyal i pèrmète anou d’sirviv i boush toudinkou : kissoi kanal de suèz, kissoi la mèr rouz, kissoi lo détroi d’Ormuz, kissoi ankor tout bann voi maritime i amenn sak nou la bézwin lé pa solman la vi shèr i sava poik anou, lo mank marshandiz i sava poik anou. Lé vré La chine épi l’Inn, épi L’afrik di sid lé pa loin d’nou mé néna bonpé zafèr ni ashté pa avèk zot.

Ni ashète an Franss épi dann l’Erop donk si bann shomin-la lé boushé koman ni débrouye anou. Mi oi nout kanar lé noir par l’fète la dépandanss la « mèrpatri »i inpoz anou. An gro la dominassion néo-kolonyal. Alor ? Alor nout parti kominiss i tir lo signal d’alarm dopi lontan mé la métropol, sa i amiz aèl, pars sé la prèv pou èl ni pé pa débrouye anou toussèl. Nou lé dépandan !

Mé lé vré ni bouj pa nou koméla, ni panss nou va touzour ansort anou. Mé kroiyé-moi é fouté vou d’dan ; a bon invantèr salu !

Justin