Matant Zélida la ékrir Justin :

Mon shèr nové, mon spèss salté, rouj-de-fon dovan l’étèrnité, si mi konpran bien zordi zot i vé zoué l’indyanoséani kont La franss… An touléka sé sak mi konpran kan mi oi zot i pran parti pou in spèss siro banna la fé dann Madégascar. Bienantandi l’érop i vé pa aoir a fère ni an blan, ni an noir avèk siro-lé mwin ossi mézami.tok ! Pran sa pou toi !

Justin la fé pou répons :

Mon vyé matant, mi pé pèrmèt amwin rakonte aou in zistoir dann tan mwin lété pti baba ? Donkalor kan mwin lété pti baba l’avé in pti voizin mèm laz ké mwin, lo lé son momon lété kontrèr alor mon momon téi fé tète ali an mèm tann ké mwin. Nout dé li téi partaz lo lé mon matèrnèl. Lo marmaye la komans alé pli bien, mé oila in spèss guérisèr k’i guéri pa inn tyork, la di sa la pa in n’afèr pou fèr, li la donn in tizane fé avèk la bav léskargo, kataplas limon, zi l’aye é d’ot koshoneri ankor, épi tout sort la kouyonad. Si tèlman mon frèr d’lé-mi di konmsa !-lé mor.

Sa sé pou domann aou si ou i pans laboratoir Madégaskar lé ankor dann tan l’aryérasyon konmsa. Mwin pèrsonèlman mi panss pa : an kontrèr mi panss laboratoir-la lé modèrn, bien finansé avèk l’ède étranjèr. Lo moune la diriz lo travaye sé in vré savan i sort La Répiblik popilèr kongo. Mi mazine galman son médikaman i sort pa sou galé mé sé lo rézilta d’in vré travaye. Alor plito ké interdi lo médikaman noré té pli proférab l’érop i pran bon l’informasyon épi toute i done la min pou amenn lo siro bien progréssé. Apré i oi !

An touléka mi pé dire aoou mwin sré konrtan si in zour Madégaskar i trouv in médikaman mirak. Mwin sré kontan si sé La Rényon k’i trouv, sansa in péi lé zalantour. Tok ! Pran sa pou ou !

Justin