So matin dann mon vyé kok loto mwin t’apré ékoute in pé toute radio é kossa mi antande ? In politissien apré koze dsi noute fitir, dsi fitir noute péi la Rényon. In bone idé an vérité. Mé oila ké li di si nou néna prozé pou fé, sé lo nèr d’la guère k’i manke anou. Alor dann son lidé, sé La franss – ké li apèl la métropol – k’i doi assime note modèrnizassion.

Mi di pa non, mi panss mèm La franss i doi assime pou son par noute dévlopman mé sak mi konpran pa sé ké li plère pou larzan. Mézami la pa larzan k’i manke anou é ni pé fé lo kalkil ansanb :

Si ni fé lotonomi dann lénèrzi – lotonomi énèrzétik – konm Paul Vergès téi di, dann tan li lété prézidan la réjyon, ala ni pé évite dépanss rante 800 épi in milyar l’ero.

Lotosifizans alimantèr é oila ankor in milyar l’éro i rèss dann noute posh.

Si ni taks lo travaye o blak san mantir néna ankor inn-dé milyar l’ero pou nou pa dépanssé par in sinp taks dossi bande zintran-in taks a ranbourssé si lo travaye lé fé dann la légalité – a pa ranbourssé si lo travaye lé fé o blak.

Alor mézami si ni kalkil bien sa i fé plizyèr milyar l’éro pou nou fé avanss toute noute bande projé kissoi lo tram-train toute alantour la Rényon, kissoi in rézo papang pou nou dézanklav lé-o épi dézangorz bande santrevil, kissoi noute konpagni bato, kissoi ankor pou sov noute konpagni l’avion.

Si ni arzoute avèk sa in fon pou dévlope La Rényon avèk bande prozé épi la partisipassion volontère bande rényoné konm lé marké dann n oute program parti kominis rényoné San mantir, mézami, nou lé anlèr.

Alor siouplé médame zé méssyé, la sossyété, la pa larzan i manke anou. Ni pé an avoir shak ané dé milyar é dé milyar pou modèrnize noute péi-mi diré pou dévlope noute péi. Mé pou sa, néna in sèl zafèr a fèr, sé bien lire é rolire programe noute parti é sète toute sak néna bande bone zidé konmsa nou va mète noute péi anlèr.

Mé i fo lantante é sirtou i fo ni trape noute majorité sinploman par pliss lotonomi. San fé pityé avèk pèrsone pars arienk avèk sak mwin la marke an-o la néna moiyin bien rogoumante noute PIB – produi intèrryèr brute – firamézir é mète anou vréman dann shomin noute dévlopman é konm mwin la marke an-o la,

La pa larzan i manke anou !

Avèk sak nou néna é sak ni pé avoir, néna moiyin pou nou moiyéné.

Justin