Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Mézami, rapèl anou in pé ! Lé pa si loin k’sa !

vandrodi 10 mars 2023, sanm Justin


Lé pa si loin k’sa lo tan konsèye réjyonal — sou Paul Vergès konm prézidan — téi vé trape lotonomi énèrjétik pou La Rényon. Li téi vé ni trape sa avèk bande sours l’énèrji La Rényon. Solèye-li, lo van li, la mèr li, volkan li.


Nou la fine anparl sa é ni koné lété kékshoz vréman intéréssan pou nou rényoné… Avèk lo tan nou nora fé lékonomi in milyar l’éro biensir so milyar-la nora rante dann noute lékonomi é konm dann tan-la nou téi vé rolanss lo dévlopan ékonomik La Rényon, sa noré ansèrv anou bien.

La trass lo plan énèrjétik ni oi sa sou la form shof-l’o solèr, sou la form bande plak fotovolitaïk, épi toute sak i konsèrn solman ni koné ossi lénèrji géotèrmik in pé la torpiyé, parèye pou lénèrji la mèr.

Kissa la fé lo sal travaye-la ? Gouvèrnman La franss sou Sarkozy, avèk l’EDF ; épi toute in bande konpliss. Mé si ni pé rèv in pé, ni pé dir dann dë zané nou nora trape nout lotonomi énèrjétik… Konm la finission la nouvèl route litoral épi lo tram-train.

Kèl gashi mé zami ! Kèl kou d’manké !

Astèr mi antan parl koman ni sa sèrv lo sho noute shof-eau solèr pou fé pass sa dann lav-véssèl épi dann lav-linj pou ékonomiz kouran ; Mi di pa i fo pa fé sa, mé pou mwin sa lé konm in panssman dsu in zanb de boi.

Yèrsoir dann télé, mwin la antande in gro mazistra apré anonss ni sava trape lotonomi énèrzétik a 60 % alé oir nou l’avé pliss zanbission ke sa — nou téi vé in vé otonomi énèrjétik total.

A bon antandèr, salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus