Kann lé pou arien ladan, sé la politik gouvèrnman — gosh konm droite — lé pou késhoz ladan. Lé vré si nou la plante kann issi La Rényon sé pars La franss épi L’érope l’avé bézoin do sik é sirtou pa dann noute lintéré anou. Mé rozman li lé la é sé a nou de oir si sa sé inn bone shoz pou nou, sansa non.

Dabor néna lo savoir bande plantèr késtyonn kane a suk é Moutama, dann son kozman yèr dann nout zoinal, é ésplike bien bande plantèr kann lé konpétan é zot néna in nivo formassion lé inportan é sa i pé pèrmète azot ansèrv zot savoir fèr pou fé progrèss kann épi noute lékonomi an zénéral.

Dézyèm zafèr issi néna in sèl kiltir i pé pèrmète bande plantèr invèsti dan la kane épi la divèrsifikassion par zot krédi avèk la banke. Donk la prodikssyon kane i pé pèrmète la divèrsifikassion, donk lotosifizanss alimantèr é sa sé in n’afèr noute péi la bien bézoin.

Troizyèm zafèr, kann sé pa solman dossik sé in kantité produi i pé pèrmète anou lanss noute lindistrializassion. Sak nou la pa fé ziska zordi pars la politik kolonyal la anpèsh anou, si ni garde noute kann ébin nou va gingn fèr.

Mi rapèl tazantan noute zoinal la fé bande niméro spéssyal pou inform l’opinyon dsu la kantité produi — ni pé i di sa ko-produi i pé tire dann kane… Lé vré si sa i intérèss anou pou noute prézan épi noute l’avnir pé s’fèr sa i intérèss pa gouvèrnman sof si ni nyabou mète ali o pyé d’lo mir.

Astèr alon dir in mo dsu l’anvironeman : la plantassion kann i ansèrv vréman a konsèrv noute téroir é si i arash kann oussa noute tèr v’alé ? Pars ni trouv ar pa lékivalan kann pou oin bone défanss noute téroir.

A bon antandèr salu !

Justin