Souvan dé foi mi rotrouv amwin dann in sityassion konmsa avèk demoune apré domandé : « Oussa i lé lo san katrovin srilanké parétil lo bato téi vien droite dessu la Rényon épi i antan pi oussa zot i lé ? »

Mwin pèrsonèlman mi partissipe pa lo déba pars mi koné pa oziss kossa i ariv dann péi laba pou k’in pé i kite zot péi pou vni issi shé nou avèk lo risk k’i anbark azot dann l’avion pou ranvoye azot dann zot péi ... Sé sak i ariv dopi in sèrtin koupe de tan é sé sak l’arivé bann dèrnyé vag la débark issi La Rényon. La plipar la rotrouv azot dann in l’aviyon pou lo rotour dann sri-lanka.

Mé arivé laba kossa v’ariv azot ?

I diré la pa lo soussi lo tribinal la pran la déssizyon ranvoye azot shé zot. Pars si nou lé klèr avèk nou mèm ni koné lo péi lé prèss toultan dann la guèr sivil avèk si mi tronpe pa in gouvèrnman k’i tiliz bande nèrvi épi diriz lo péi konm inn klique demoune mal fondé.

Alor mézami, mwin lé a domandé kossa l’ariv plizyèr santène srilanké nou-la pa nou mé sé nou mèm final de konte- la ranvoye azot shé zot. Zot lé ankor vivan, sansa san vi, sansa ankor apré sèye sové dan lé boi...Alala mon soussi mé pa sète la plipar d’moune mi antan apré kozé..

Lé vré noute péi lé pti épi li la poin gro-gro moiyin donk mi pé pa souète bande migran i vien issi La rényon avèk toute problème nou néna nou mèm dann nout péi. Mé la pa pou sa ké mi aprouv la déssizyon tribinal la pran pou ranvoye azot shé zot, san konète sak i sava ariv azot laba. Pars néna in n’afèr mi panss pa nou lé an droi tonb dodan sé la non-assistanss pou demoune an danzé é si nou lété dann in ka konmsa kissa sar résponsab de sa.