Kissa i ansouvien ankor bann zané Mitterrand ? Kissa i rapèl lo bann réform pou loutremèr ? Na in pé dan la bann, la fine alé koté tanto : la natir i prosède par éliminasion. Na in pé ladiabète, la tansion, lo koléstérol épi tout lo bataklan la fine lévé. I fé arien : la vi i marsh konm sa, nana son bon koté, nana son mové koté.

La pa sa mi vé anparlé : mi vé anparl bann réform Mitterrand la sèy fèr dann loutremèr. La, moin lé sir, dann z’ot tète, na in nafèr la vni toutsuit sé “Lassanblé-unik”. Oté baya ! La fé dézord pou sa. Tout bann wati-watia ! Tout lo patakès ! Tout sa mansonz la di dann tan-la.

Ziska, Ziskar D’Estaing, la sort son rotrète pou anbar lassanblé unik. La Rénion, té pa an rotar la-dsi : bann roiyal bourbon la donn la voi. La fé manifèstasion pou fé pèr d’moun. La di, i vé sépar La Rénion ansanm La Frans. Pa la pèn dir, kan na in mové kou kont La Rénion, Virapoullé lé dann ta.

Ala pak’lo prézidan Sarkozy i nonm in komission épi lo komission i dmann pou siprime lo konsèy zénéral. Akoz sa i ansèrv pi granshoz. Lèr-la Konsèy Rézional i vien in bèl zafèr. Sré t’i pa sa mèm l’assanblé unik ? I arsanm bien touléka. O fète, lé ga ! Mi antann pa ankor tousa bann kriyèr d’nuite. Lé drol non ?

Justin