Koz èk moins é koz èk in kouyon, mé sé o pyé d’lo mir k’i i lo vré mason. Mi rapèl étan pti nou téi rèss pa tro loin in boutik shinoi - Lo boutikyé téi di souvan défoi in drol kozman : li téi di « Bondyé mon vant ». Kan ou lé pti épi kan ou i viv dann in famiy katolik mi pé dir azot sa lé shokan. Kan moin la antann kozman-la, moin la rakont sa avèk mon famiy banna la réponn amoin :« Bononm-la i doizète matèryalis sa ! ». Matèryalis ? Sa sé in bèl mo sa kan ou lé dann kour moiyin promyèr ané. Konm moin la fé zyé ron, momon la di amoin alé oir dann diksyonèr. Oté ! Moin l’avé rode traka pou mon kor. Mé konm el la pa tro vèye amoin, moin la sové pou alé zoué trou… Mi rapèl pi la suit mé mi rapèl in frèr amoin la fé tout in lamizman avèk lo mo « matèryalis »si tèlman ké kan lo soir la tonbé, in pé té i kriy amoin konmsa. Néna lontan donk ni arète la mé mi pé kant mèm domann azot pou rofléshi dsi sète afèr-la é ni artrouv pli d’van. Sipétadyé.