Matant Zélida la ékrir Justin :

Mon shèr nové, mon spès salté, rouj-de-fon dovan l’éternité,
vi koné, mon névé, nana in sakré polémik dann gouvèrnman. La frans sé zour isi, par raport Christiane Taubira. Figuir azot minis-la, dann in sérémoni ofisyèl, la pa shant La Marseillaise, pars li la profèr rès dann silans épi li la di li la profèr rofléshi. Etone pa ou, la droit la mont dsi èl épi la di lé pa normal ditou in minis gouvèrnman i shant pa l’ime nasyonal. Mèm ké désèrtin la domann son démisyon. Kan ou lé minis, mon nové, i fo ou lé patriyot pou dé, é si ou i vé pa amontr ou lé patriyot sa i vé dir ké ou lé pa...donk ou la poin out plas dann gouvèrnman La Frans. Pou anshèv agrav son ka, èl la déklar dsi son kont touitèr, èl i préfèr réfléshi plito k’anvoy in karaoké d’si l’éstrade. Donk la droit i domann ali pou démisyoné, fron nasyonal galman, inn dé zékrivin i ardi la mèm shoz. Moin, pèrsonèl, moin lé dakor èk banna, soi ou i shant la marséyèz, soi ou i démisyone. Tok ! Pran sa pou toi !

Justin la fé pou rrépons :

Mon vyé matant k’i koz touzour la boush rouvèr, mi trouv ou nana gran-gran z’idé koméla.
Si mi konpran mèm ou lé dann ziri lo patriotism, vi k’ou osi ou i donn aou lo droi pou ziz si in minis lé dign ète minis sansa si li lé pa. Matant, m’a anshèv fé mont out gaz ankor in pé..i paré prézidan la pa shant non pli, épi d’ot minis ankor. Donk, i fo fé démisyone total èk kapital... Mé ou i trouv pa in pé étonan banna i pran in madam épi in madam noir pou krétiké konmsa ?. Sa i étone pa ou ? Romark bien madam Taubira i dégonf pa pou in riyinn shoz konmsa ;..konm di lo kont, èl i tranm pa dovan graton, é lé tanmyé konm sa.
Astèr moin l’apré kalkil in n’afèr : lé vré la marséyèz lété souvan dé foi koté k’i lite pou la libèrté, é dann komansman lété in l’ime révolisyonèr donk ni pé an avoir in bon l’opinyon pou li..Mé pa touzour. Pou koué ? I ariv ké la shant la marsèyèz dann bann guèr La frans l’avé poin in bon rol pou zoué. Kansa ? Kan té apré amenn bann guèr kolonyal. L’èr-la èl lété dann kan bann z’ènmi la libèrté. Moin, pou mon par, kan té i fé la frode èk la réprésyon isi La Rényon é k’in minis ou sinonsa in profé té i fé akèy ali avèk la mizik l’ime nasyonal, mi pé dir aou moin té pa tro fyèr pou shant in n’afèr konmsa. Pars La Frans té i vienn étouf la libèrté é lo trépé téi pran l’onbraj dann drapo blé-blan-rouj, épi té i rédi lo kor kan la marséyèz i sonn, moin té pa dann z’ot kan.Tok ! Pran sa pou ou !

Justin