Sa té in kozman moin l ’avé pa antann dopi lontan ziska ké zédi matin, dann in l’émisyon Jacky Revel dsi Rényon-Promyèr dsi bann koméraz la sipèrstiyon in l’oditèr la apèl lo radyo pou di lo l’animatèr : zistoir i fo pa tourn baskil dann la kaz, li rapèl bien, pars li la fé é son famiy la fout ali inn shof. Si tèlman la shof ali ké li la obli di mèrsi pars si ou i di a mèrsi. Sa sé in n’afèr la ral amoin bien pars in madam koté la kaz moin té i arète avan, téi korij son garson Zilbèr é té i fo lo ga i di mèrsi pou èl arète suif ali. Pars si ou i di pa mèrsi nana ankor in ristourn pou ou. Alé ! nou va artrouv plid’van, sipétadyé.