Mi sort lir dsi Imaz press Reunion in nouvèl konm de koi, la méri Sin-Pol i sort anil in gran lanbyans té i di doi fé lo 25 moi d’mé pou inoguir lo rakomodaz lo stade Julius Benard. Défoi sa i ariv, i ariv pou in bon konm pou in mové rézon, mé so-kou issi, i paré lo bann rotour d’plasman bann biyé té pa sifizan pou pa anpèrd larzan dann l’anbyans-la. Pou bien konprann lé shoz koman la spassé i fo ète anndan. Pars dopi an déor, lé pa possib bien oir lé shoz.

Bien antandi, bann moun pa kontan la komans fé wati-watya. La krétiké ! Sa lé normal. Mé sé lo kritik lé bon alé oir, pars zot lé zantiy vèy pa koman. In pé i anparl in jéstyon kominis mizérabilis, par in bann fonksyonèr inkonpétan, par dmoun i koné mèm pa la loi lo marshé. Anplis ké sa, i mète pénalité d’rotar vèy pa konbien. Aprésa, i raprosh sa avèk sak in pé i apèl in mové zèstyon bann z’afèr rokin. Dakor, mi koné pa bien lo ka, konm mi sort di épi i fo suiv in n’afèr dopi lo komansman ziska lo finisyon pou bien konète lo maniman la manivèl.

Pou mon par, mi oi pa tro kosa l’opignon bann moun i vien fèr la-dan. Mi trouv i égzis solman dé kalité zèstyon, in bon zéstyon épi in mové zéstyon. In légzanp : kan Pierre Vergès la amène lo projé tram-train, sa té in n’afèr d’bone zèstyon. La pa bézoin pran kont si Pierre lé kominis. Sak mi koné, sé ké li la gingn in rékonpans pou lo PPP (parténarya-piblik-privé). Lo bann mové zéstyonèr sé sak la vni apré pou avoir siprime lo projé, é bann torpiyèr sé in bann moun la droite. Donk ète dan la droite, sa i vé pa dir, an avoir in brové bone jéstyon. Tank a la zéstyon kominis Huguette Bello, éskiz mon pardon, mé mi pans pa èl lé si tèlman kominis ké sa, vi tout sak li la fé pou sabote parti kominis, é pa arienk zordi ! É tout sak li kontinyé fèr.

Pa pli loin ké dimansh li la fé son prop parti. L’èr-la, skiz amoin dsi son zéstyon an kominisité, pars li lé fine ariv dann l’anti kominisité.

NB : bon la méri Sin-Pol la anil in lanbyans. Dakor ! Mé ousa i lé lo vré késtyon ? Noré poin in késtyonn kont kanpagn la-dan ? Sirtou si lo mèr, i fé mont son figuir partou-partou ! Sansa, noré poin in kloz pou mète la komine dann l’obligasyon pèy lo défisit ? Sak mi di, sé pou fé bate la lang é pa plis.

Justin