Matant Zélida la ékrir Justin :

Mon shèr nové, mon spès salté, rouj-de-fon dovan l’éternité, moin la bien suiv lo sobatkoz dann télé la somenn dèrnyèr. Moin lé bien kontan lo ga FN la mord zot parti rouj pars li té anparl La Rényon konmsi té pa La frans. Lo boug la di : isi nou lé an Frans é i fo anparl La Rényon konm in kartyé La Frans mèm si lé dann l’oséan indien. Té i mérit ali, pars an plin dann vintéinyèm syèk, sa la pa in n’afèr pou dir. Tok ! Pran sa pou toi !

Justin la fé pou répons :

Mon vyé matant k’i koz toultan la boush rouvèr. Mi pans ou la pa tro ékout nou kamarad é sirman ou la pa antann sak li té apré di. Li la di bann problèm La Rényon lé grav. Vré pa vré, vré sirman !. Li la di i fo tout rényoné intérésé i débate pou trouv bann solisyon k’i fo. Lé vré, lé pa vré ? Lé vré sirman !. Li la di nout parti lé dakor pou diskite avèk tout bann mouvman épi tout demoun i vé rode solisyon pou nout problèm. Sé in n’afèr k’i fo, sé pa in n’afèr k’i fo ? Sé in n’afèr i fo fèr. Ni pé kontinyé lontan ankor konmsa mé pou zordi ni arète dsi in sèl z’idé.

Kisa i roprézant La Rényon konm moun résponsab ? Kan siklone Habiba i marsh dsi nou, kan la vi d’moun lé dann danzé, mi antann pa la voi prézidan konsèy réjyonal, ni sète prézidant konsèy zénéral. Bann dépité lé konm martin ki kouzi. Lo préfé, sanm pou moin, i konpran pa granshoz dann riyin. Alor, moin lé a d’mandé mé moin na la répons : nana, na poin in in pilot a bor ? Sanm pou moin non !

NB. Mi koné pa si moin la fine di, mé pou k’in parol i arès dann mazinasyon demoun i fo lo kozman lé bien roulé é pti provèrb moin la mète an-o la, li lé bien roulé pou vréman é sa i rotien nout mazinasyon.