Oté

Mi domann amoin, si l’ékol sé pa in n’afèr tro sèryé pou konfyé sa l’édikasyon nasyonal !

Justin / 10 octob 2016

Samdi, moin l’été dann in gran rényon é moin la aprann dé shoz intérésan mé sirtou moin la antann in bann shif i fé mal. Bann shif dosi kosa ? Dsi lo nonm demoun inskri Pol Anploi, dsi lo nonm demoun lé dsou lo marsh pyé la mizèr… épi, ankor in foi lo nonm de moun i pé di zot lé ilétré. Kosa i lé in ilétré ?

Pou la frans i pé parl in ilétré si in moun la parti l’ékol normalman i koné pa lir asé bien, ni ékrir, ni konté, ni an avoir bann konésans de baz pou ète otonom dann la vi kourant konm fé in démarsh, ranpli in dosyé sinp konprann in mésaz ékri épi kominik dsi in mésaz sinp, suiv in formasyon. Kisa i désid sa ? Sé bann z’ankétèr l’insee k’i désid in n’afèr konmsa é ziska zordi pèrsone i donn pa la démanti.

Donk nou lé 116000 rényoné, zordi ankor, i pé konsidèr anou konm ilétré. Sa i fé bokou sa ? Sa i fé 21 % bann rényoné na l’az pou k’i mète pa zot nom an parmi bann z’ilétré. Sa i vé dir kan ou i kroiz sink pèrsone dann shomin lé posib nana inn lé ilétré dann ta, si ou i kroiz sinkant nan dis, si ou i kroi mil nana plis dé san. Donk tousa d’moun lé dan la soufrans par raport z’ot vi kourant konm lé marké an o la… I paré d’ot na plis difikilté ké nou mé konm i di, sa i fé anou in bèl zanm.

Pou kosa mi parl de sa ? Pars in zanfan d’amontrè konm moin - instititèr(tris)si zot i vé - i soufèr kan li lir bann shif konmsa. Sirtou kan ou i oi nana l’ékol partou, kan ou i kroiz près toultan in takon marmaye apré alé l’ékol épi kan ou i koné nana kaziman san-pour-san d’moun la parti l’ékol o moins dis z’ané, dé foi plis ankor.

Alor ni doi domandé kosa k’i éspas ? Kosa k’i épas dann l’ékol La Rényon pou in rézilta konmsa ? Ni doi domandé si lo zoutiy lé bien adapté ? Si ni doi di, par ébzanp, l’ékol sé in n’afèr tro sèryé pou konfyé sa l’édikasyon nasyonal ?*

NB * Clémenceau té i di pa : la guèr sé in n’afèr tro sèryé pou konfyé sa bann militèr ?