Médam, Mésyé, La Sosyété, koz èk moin sé koz èk in kouyon-sé o pyé d’lo mir k’i oi lo mason. Mi pans zot i koné déza lo kozman : « Mi amontr pa lo shien pou manz mayi » sansa li va fé amoinn tor, li va détrui mon karo mayi. Michel Admette i di pa dann in shanté : zanfan la pa moin, mi done pa manzé, mi nouri pa lo vèr pou pik mon kèr ? Dizon sa sé in kozman i plé pa moin ditou poitan mi souvien bien kan moin té i travaye souvan dé foi moin téi antann demoun di zafèr konmsa. Zot i pans pa konm moin néna in zafèr lé visyé ladan ? Sa i rapèl pa zot mové souvnir ? Lé sir ou i sava pa amontr out zènmi koman i fé pou détrui aou,. Sa la pa in n’afèr pou fèr ! Mé la pa non pli in n’afèr a fèr ké si sé goumant l’inzistis, priv demoun dann lo bézoin. Alé ! Mi lèss azot fé travaye zot koko la dsi é ni artrouv pli d’van. Sipétadyé !