La pli la tonm inn ti pé ; zèrb la pousé ; fèt kaf dan la kour : blizé fé inn ti nétoyaz.

Si premiè siklone la sézon i viin pa anmaiyé lo programme ; ou na klotir po anbar poul po déplasé ; bann pié zanbrovat lané pasé fo arasé ; in liane ti poi i ress, tir a li, done kabri.
Astèr, po pa fatig tro mon do, mi pran in tabouré ; zot i koné bann ti sèz le Gol ; lo dérièr lé biin kalé ladsi.

Kokol (in pé i di guérivit), zèrba bouk-kan moin té pti, téi fé bouyir é ti tranp mon zanm na plin boubou-Pikan zèrb po lapin, mon voizin la fé romark a moin ; lapi tro ; konm si in not zèrb la pran son plas-konkurans déloyal.

Lo pli gayar sé lodèr lo zèrb, out min i san, i san koué ? I san lanfans ; ou la grandi dann zèrb po bèf, zakasi po koson ; zavoka maron, trèf (lo gou èg-asid)-trèf néna 3 féiy- Bitasyon na in parfin ; la tèr ou kraz dan out doi… sé sa ki nouri a nou.

Ti préfèr la vil ou la kanpagn.
Parfoi ti giny pa soizi ; ti viv ou ti lé, ou ti doi.
Mé lo matin, la rozé, soleyi i lèv ti dousman ; zoizo ,perdri, cay, tourtrèl i nétoy zot plim , i kour rod manzé ek zot bann ti.
Pli tar, si na la pli, tang i mars ek son dizinn ti boul pikan dérièr li.

Azout ék sa dan lé o, marmay, ni rogard la kot, loséan, nou voi lo trin konm i ti shenign noir i kour bor la mèr ; li lé fatigé, lisort loin ; li lé présé arivé, li sif, voyazèr osi lé las ; mi voi pa , mi mazine, mi rèv, in zour pétèt ma voyazé par trin, par bato.

Mé minm lo zanimo na son lodèr ; lo fouraz ti done a li osi.
Mi èm lodèr kol-kol, pikan, zèrbabouk ; i rapèl a moin plind zafèr, plind souvnir !

Justin