Si in moun i koné in pé moindroman listoir nout péi, li pé romark in n’afèr : mèm si nout listoir lé kourt, olèrk ni sava vite, ni sava pli dousman k’méssyé dousman.
Mi vé anparl bann shanjman dann lo sosyal épi dann lékonomi. Oplis demoun lé préssé, oplis in n’afèr lé irzan pou fé, oplis i tard pou arivé !

Dopi dizuitym syèk, bann filozof épi bann moun léspri in pé rouvèr té i vanj pou labolisyon lésklavaz. Mé la gingn fé so zafèr-la solman lané 1848. É ankor té pa byin fini, vik li la pran in form maské avèk sistèm zangazé.

Lané 1946 la vote la loi départman fransé ; té i doi aplik sa an vitès lo promyé zanvyé 1947. Mé la mète plis sinkantan avan k’i vyin a bou aplik ali pou vréman. Azout èk sa lésploitasyon kolonyal la kontinyé. Konm di lo kont : la tir in linz, la armète in n’ot, la mète in mask mardi gra déssi la figuir, mé la rès tèl k’i lé, avèk son vilin figuir, avèk son vilin réalité.

Zordi, nou la bézoin nout dévlopman : sa i fé tan é tan d’zané Parti kominis épi bann moun bone volonté i vanj pou sa. Kansa nou va nyabou fé nout dévlopman dirab ? Mi éspèr sar pa pou la Sin Glin-Glin !

Justin