Kissa la invant so trann-sink èr travay par somen la ? In ! Mi pans sa i doi ète Lionel Jospin, sa. Moin lé sir sé li la invante sa ! A, sa in bon l’invansion - in l’invansion mirabolant ? Lé pli for l’invansion balié nik, lo tiède, avèk zèf bouyi. Touléka, moin pèrsonèl, dopi la mète sa dann l’antropriz mi travay, la vi lé dos pou moin. Mi travay, mi travay, mi travay, a-fon, a-mor, san près arété. Toultan mi broute.

Oir zot mèm : mi rant travay sizèr-édmi, mi prépar mon pate, lo fars, épi la, mi roul samoussa ziska dé zèr : par-la. Névèr, mi manz in morso, mé lo kèr la pa klèr, akoz kan ou i zoué dan la boustifay, léstoma i rofèrm. Parèy kan i ariv dé zèr, mi mash-mash in pé, épi mi atann patron... Sa in bon patron, mi ashèv dir akoz si li oi mi fé l’èr in pé dézévré, li di : « Losikré, kossa l’arivé ? Ou i vé pous ankor in pé ? ». Konm mi èm travay, mi fé ali pou répons moin lé dakor.

Astèr mi fé bégné, nèm, makaroni shinoi. A-fon, a-mor. Mi roul-mi déroul, mi roul, mi déroul. Lo tan réspiré moin la poin. Sa i amène amoin si l’kou d’sizèr. Patron lé pa rogardan, li félisite amoin, li di : « Sa in boug bien travayan sa ! ». Alor, moin lé flaté. Si i di amoin pass in koud balé dan l’atlié... mi fé ! Si i di nétoy lo mashine... mi fé ! Si i di fé in pé lantrotien lo four... mi fé galman. Oté ! Mi gingn pi s’anpass lo trann-sink èr !

Justin