Médame, zé Méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Mézami, mi panss, konm mwin, zot la fine konète demoune – é néna pli k’i anfo – i diré zot i koné toute zafèr. Zot sé méssyé, sansa madame zésétou. Pa moiyin amontr azot in n’afèr, ésplik azot kékshoz, wi diré zot i koné toute, partou, toultan.

L’èr-la lé difissil asplik azot kékshoz. Sa, o fon, sa la pa grav pars la pa bézoin fé konète in moune kékshoz si li koné toute-la pa bézoin done dolo in milé la pa soif. Mé sak lé grav sé ké lo boug i panss li koné, li la pa pou aprande arien. Son l’orgèye va fou ali atèr, é si li lé kouyon, li va viv konm in kouyon, é li va mor konm in kouyon. Lé rogrétan mé lé konmsa.

Mé antansyon, la kouyonis sa sé in n’afèr bien réparti. Kouyon, i tyé kouyon pou pran son plass.

Alor, mi invite azot bien rofléshi la dsi : « mi koné pa » va aprann dé shoz, « mi koné » la pa pou aprann arien. Zot néna lo shoi é ni artrouv pli d’van, sipétadyé.