An touléka mi sort antann in n’afèr é lé bien domaz prézidan la pa sonn amoin pars moin l’avé in solissyon pou son problèm. Kèl problèm ? A s’ki paré li la fé ashté pou douz mil éro l’imodium – in médikaman kont lo rolashman – i fé bokou mèm pou in prézidan é la suite k’i suiv ali. Rolashman ? Oui rolashman pars lo léstoma épi lo l’intestin lo prézidan lé pa tro vayan avèk manzé bann z’indien. Mi koné pa si sé lo masalé k’i fé pa li d’bien mé antouléka, même si sa lé vré, 12000 € sa i roprézant in sakré gro dépanss.

La pa moin pèrsonèl la péyé, mé mi panss an avoir pèye in pti bout dodan… Mé, si lo bann z’ofisyèl té i koné in pé myé La Rényon zot nora pa gaspiye z’ot larzan avèk lo l’imodium. Pars nou issi – shé nou – nou néna ségré dann domen-la é anpliss i kout pa shér. Nou néna l’ayapana ! Nou néna koka sho, épi in bonpé z’afèr ankor. Par l’fète Nadia Ramassamy té an parmi lo voiyaz ébin èl noré pi aport son méyèr sokour. El té bien plassé pou sa, mé pé sfèr la pa dmann aèl son konkour. Pé s’fère èl la pa konu lo délégassion offisyèlla gingn in lépidémi d’mal de vante. I di ossi in kour d’vante, i di galman in tralala épi néna ankor in kantité d’mo pou sa.

Antansyon kant mèm méssyé lo Prézidan ! Si gouvèrnman la bien suiv l’afèr, néna d’apré sak i di in komansman dézord dann loséan indien rante bande gran puissans é banna l’apré tiss zot toil zarnyé la défanss dann noute losséan é gouvèrnman sré bien avizé domande anou noute poinn vizé, pars promyé trakassé sé nou – losséan indien sé konm ki diré noute maré nostrom é nou ni vé loséan indien zone de pé é pa zone de guèr.

Mé la pa pou sa i fo pran limodiome par tone, konm mi di aou, issi La rényon néna toute sak i fo é anmoin shère ébgran bénéfiss i garde lo ùmoune la tète bien frèsh pou bien kalkilé.

Justin