Kosa mi lir dsi l’internet, sa lé for in n’afèr konmsa ! I parétré médam mésyé, sèr z’ami d’ Justin, ké prézidan la Répiblik La frans, la parti voiyaz in kou dann l’Inn. Normal ! L’inn i tard pa sar dann lo kat pli gran péi dsi la tèr. In gran péi konmsa i pé pa lèss dsi l’koin sirtou si néna biznèss pou fé ansanm.

An touléka mi sort antann in n’afèr é lé bien domaz prézidan la pa sonn amoin pars moin l’avé in solisyon pou son problèm. Kèl problèm ? A s’ki paré li la fé ashté pou douz mil éro l’imodium.-in médikama kont lo rolashman ; i fé bokou mèm pou in prézidan é la suite k’i suiv ali. Rolashman ? Oui rolashman pars lo léstoma épi lo l’intestin lo prézidan lé pa tro vyan avèk manzé bann z’indien. Mi koné pa si sé lo masalé k’i fé pa li d’bien mé antouléka, si lé vré, sa i roprézant in gro dépans.

La pa moin pèrsonèl la péyé, mé mi pans an avoir pèye in ti bout dodan. Mé, si lo bann z’ofisyèl té i koné in pé myé La Rényon zot nora pa gaspiy z’ot larzan avèk lo l’imodium. Pars nou isi nou néna ségré dann domen-la é anplis i kout pa shér. Nou néna la yapana ! Nou néna koka sho, épi in bonpé z’afèr ankor. Par l’fète Nadia té an parmi lo voiyaz ébin èl noré pi aport son méyèr sokour . El té bien plas épou sa, mé pé sfèr la pa dmann aèl son konkour.

Antansyon kant mèm ! Si gouvèrnman la bien suiv l’afèr, néna d’apré sak i di in komansman dézord rant La Chine épi l’Inn. Inn konm l’ot, i paré, l’apré tiss z’ot rézo dann l’oséan indien é nou, rényoné, ni pé lav nout pyé dann l’oséan indien donk sa sé in n’afèr i intérès anou, pétète i trakass anou, é gouvèrnman La frans sré bien avizé pou domann anou kosa ni pans dé sa. An moun intérés par sak in pé rant nou iézite pa anparl konm in trikmardaz mé nou va anparl de sa… Kan lo prézidan sar fine rétabkli son tranzite.

NB Si bann z’ofisyèl i vé bien, pou moin zot téi pé sonn Justin pou li done-non plito vann-azot i bon konsèye. Koméla, i gingn pa arien pou arien. Sé sa la vi.