I pé pa dire banna lé pa dann lo tinmpo. I pé pa dire pou banna, gouvèrné sé prévoir sé in blag marmaye kolèj. I fo dire antouléka méssyé Macron sé in boug avizé é son tète i travaye san a l’èr.

Mé antanssyon, banna lé réalist. Zot i koné bien in plan pou lotosifizanss dann lénèrji sa i trouv pa sou la pate shoval, i gingn pa sa arienk an krakan lo doi. Zot i koné boudikonte sa sé in n’afèr va mète lontan pou ariv o bite. Si i ariv !

Toussa lé bien bon mé konm di lo konte mwin néna in provèrb pou sa é provèrb-la i di : « La pa kan la shass lé rouvèr k’i fo komanss drèss lo shien ! ». Na in n’ote ossi mi yème bien é i di konmsa : « La pa kan na pi d’ri k’i fo alé plante manyok. »

Alé ! Ni artrouv pli d’van, mé mwin téi vé kant même dir sa méssyé Macron. La pa ké sa va ède ali dann son politilk, mé sinploman pou di ali néna lontan – dopi ké lo monde lé monde – kalité sityssion konmsa, la pa promyé foi, ni koné in n’afèr konmsa.

Justin