Mésyé, Médam, La Sosyété koz èk moin sé koz èk in kouyon-mé sé o pyé d’lo mir k’i oi lo mason. Zot i koné margoz ? Sa sé in nouritir marmaye i yèm pa sa-li lé si tan tèlman amèr ! Si tèlman mi sort lir dann zistoir kristyan, bann zanfan lété fine fatigé manz margoz, zot la tyé lo pyé avèk lo bouyante. Solman lo pyé la ropousé baba é la donn ankor plis é ankor plis pou manzé. Amenn la vi an margoz sé trouv l’amèrtime partou. Sé pa trouv konm k’i diré in koin syèl blé pou lo zyé ropoz in pé. Lé vré na d’moun amenn la vi konmsa : an margoz ! an margoz amèr ! é sa sé in n’afèr i trap bonpé d’moun. Pou zot la vi lé pa bèl, èl lé an margoz, èl lé amèr. Mé antansyon i di osi margoz lé amèr mé lo grin lé dou : sa i vé dir dann kèr so n l’amèrtime i ariv la vi in pé z’ète dos kansréti in pti pé – in pti gine-gine. Alé ! Mi kite azot rofléshi la dsi é ni artrouv pli d’van. Sipétadyé !