Mon késtyon sé si sa lé déstiné a rann bann zanfan pli intélizan sansa pli kouyon. Mi pé azoute d’ot késtyon konm si sa i ranfors lo lib-arbite osinonsa si sa i afébli ali. Si avèk sa wi mète dann magazin la konéssans pliss konéssans ké ou néna zordi sansa si wi arzoute dann sak oute konéssanss in ta la kouyonade an pliss. Mwin lé sir kan mi di sa, in pé va panss kossa ilé so mani d’aprann, so soussi d’ranfors oute lib-arbite, sansa si-pli rézilian par rapor lo bann lagréssion la kouyoniss. Si wi vé bann zanfan zordi i vien pli instrui, pli lojik, pli rassyonèl par raporte bann zanfan yèr osinonsa lo kontrèr.

Mi di sa pars mwin la aprann lo Tik-tok lété an vante in kapitalist amérikin. Mwin l’aprann galman lo nouvo pouvoir fédéral la pa éstope la vante mé la donn lo Tik-tok pliss lo tan pou li rode in bon lashtèr… Samdi matin mwin la parti in konféranss dsi lintélizanss artifissyèl é lo konféranssyé la di Tik-tok pou bann zanfan chinoi lé pa konm Tik-tok ni pé oir dann Lérope, Lamérik é mèm issi. D’in koté i paré sé pou rann demoune intélizan, lojik, rézonab - laba dan La chine - é karéman d’ote zandroi sé pou rann bann marmaye pli inbéssil.

Lo problèm sé ké mi koné pa si toussala lé vré. Mi koné pa non pli la réakssion bann marmaye dann toute péi. An fète mi koné pa la réalité roshèrché avèk la réalité i gingn trapé… Mé mi pe dir azot dopi in sèrtin tan mi konsidèr bann fèyton k’i pass dann télé i vé abétir lo bann téléspéktatèr, antouléka i vé pa rann azot pli intélizan… Mwin la antann dir bann kapitaliss la télé i rode arienk vide in pé bann sèrvo pou mète la piblissité anndan, aféblir la rézistanss bann sèrvo.

Si sa lé vré mi panss i fo konbate ali pars sa lé pa bon pou lo pèp, lé pa bon pou son rézilyanss.

A bon antandèr, salu !

Justin