Médame zé Méssyé, la sossiété, koze èk mwin sé koze èk in kouyon, mé sé o pyé d’lo mir k’i oi lo masson.

Mézami, mi panss zot konm mwin nou la fine fé léspèryanss-la, l’ariv in foi sansa plizyèr zot la pa oze di zot i koné pa sansa zot i konpran pa. La pèr pass pou in inbéssil, la krintiv in kassaz lé kui é mi panss zot la du romarke koman lé difisil an sorte azot dann in pyèz konmsa. Néna dé foi mi pé assir azot mwin la rogrété fé konmsi mi koné sansa konmsi mi konpran, pars i sifi d’in afèr konmsa po gate in zourné.

I fo dire nou lé dann in sosyété bonpé d’moune i fé sanblan é kan zot i di zot i koné la plipar d’tan, i koné pa inn mèrde. Di wi koné pa sé prann la sossyété otroman ké li lé, in sossyété d’aparanss é in sosyété konmsa mi pé dir azot sa i ankouraz pa lo progré.

Alé ! Mi kite azot rofléshi dsi lo lavantaz épi lo linkonvényan dir la vérité, mé sa i dépande shakinn. Antouléka sa i mérite in réflékssyon. Ni artrouv pli d’van. Sipétadyé.