Mézami, mi panss zot konm mwin nou la fine fé léspèryanss-la, l’ariv in foi sansa plizyèr zot la pa oze di zot i koné pa sansa zot i konpran pa. La pèr pass pou in inbéssil, la krintiv in kassaz lé kui é mi panss zot la du romarke koman lé difisil ansorte azot dann in pyèz konmsa.

Néna dé foi mi pé assir azot mwin la rogrété fé konmsi mi koné sansa konmsi mi konpran, pars i sifi d’in afèr konmsa po gate in zourné. I fo dire nou lé dann in sossyété d’fère sanblan é kan déssèrtin i di zot i koné la plipar d’tan, zot i koné pa inn tyork.

Si wi koné pa sé prann la sossyété otroman ké li lé, in sossyété d’aparanss é in sosyété konmsa mi pé dir azot sa i ankouraz pa lo progré… Alé ! Mi kite azot rofléshi dsi é ni rotrouv pli d’van. Sipétadyé.

Justin