Mé z’ami, si mi di azot, dsi la késtyonn kréol rényoné, an tou tan, moin la touzour gard konfyans. Pé s’fèr zot va réponn amoin moin té i gard pa la vérité an fas. Moin té i rofiz oir lo vré pars lo fo téi kontant amoin tro, téi bote amoin tro.

Pou kosa mi di sa ? Pars néna kékzour moin la trouv in dalon, é dalon la, la di amoin konmsa : sanm pou li kréol rényoné l’apré disparète. Kan moin la di : ankor in moun pou pans in n’afèr konmsa ? Figir azot li la di amoin, i fo mi poz ma pate atèr, pars a tro marsh tète an l’èr moin lé riskab pa oir la véritézamé.

Kan moin la domann ali, kosa i lé pou li la vérité, li la réponn amoin : la vérité sé ké lo fransé l’apré manj lo kréol rényoné konm i manz zaran. Kaziman, l’apré vir son po d’jak... Si mi di azot son réfléksyon la zète amoin dann in virvir pa posib, zot lé kapab dir kozman – la, la sakouy mon konviksyon. Poitan non ! Pou kosa d’apré zot ?

Pars kan i di amoin in kékshoz konmsa, mi komans par pans tout bann bon ségatyé l’avé dann tan isi La Rényon é néna ankor zordi. Mi kalkil galman nout maloya, koman li la sort dann fénoir pou rant dan la limyèr. Aprésa, mi majine ankor bann fonnkèr, l’imour kréol, zistoir tizan épi d’ot ankor. Kan, mi mazine dann mon tète bann bon z’ouvriyé la lang kréol rényonèz, tousala i ardonn amoin mon kroiyans de fon dann in lang kréol rényonèz bien vivan, bien partazé par la mazorité d’moun, é bien vala pou bann syèkl i sava arivé pou donn demoun in bon roprézantasyon l’idantité rényonèz.

Astèr, sak lé sir, moin la poin konfyans dann lo mélanjaj. Mi souète pa k’i mélanj : kréol rényoné sé kréol rényoné ! Fransé sé fransé ! D’ot lang sé d’ot lang. Lang rényonèz ? In mélanjaj, sa sé in n’afèr k’i plé pa moin ditou. Dann fon mon kèr mi souète in bon zoutiy de lang, pou nou bien travaye ansanm, pou travaye ansanm konm k’i fo… I paré désèrtin i souète in lang rényonèz mélanjé.

Mi kroi dan la lang kréol rényonèz konm in bon zoutiy pou roprézant nout l’idantité, sak ni lé, sak ni vé ète, dann nout rényonèzté é konm mi di, pa in mélanjaj kozé.