Fransh vérité sa in kozman mi èm pa. Zot i konpran sak sa i vé dir ? Sa i vé dir si ou i vé pa out fiy i sort avèk mon garson ébin ou i ramas ali. Mi sipoz, konm moin, sa in patoi i shok azot in pé. Pou kosa ? Pars sa i tourn lo do avèk l’égalité rant fiy épi garson, fanm épi lo zonm. Moin na la krintiv, sa i fé kroir bann garson zot nana tout lo droi… daoir, pars zot i gingn pa tonm an voi d’famiy. Zot épi moin galman, n’i pans sa in kozman séksis ? Sa lé sir. Mé konm zot i koné dann bann kozman nana lo méyèr é nana lo pir. Souvan inn i di lo kontrèr d’sak l’ot i di. Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké rant-rant, ni pé z’ète, tazantan, dakor rantre nou.