Mézami zot i koné graton. Zot i koné sa sé in n’afèr bien roshèrché. Zot i koné néna dë kalité graton : graton la po, épi graton la pane. Mé lo méyèr di méyèr sé lo graton la po avec in lèz la grèss dossou — la grèss sé la pane — épi lo fin di fin sé la shèr dsou la grèss : sédèv an péril zordi pars lé rar demoune i travaye ankor solon nout tradission. Mi panss bane zamatèr graton la fine konprande amwin.

Astèr si ni mazine nout kozman pou la route, ni konpran toutsuite kossa sa i vé dir. Sa i vé dir wi sava pa tir lo méyèr d’sak néna dan mwin : lo méyèr dan mon travaye, lo méyèr dann sak mi mazine, fin d’konte lo méyèr d’sak mi gingn fé. In kékshoz zordi ké lé plizanpli inportan koméla ké shakinn i vé garde lo méyèr pou li, kissoi son ségré d’fabrikassion, kissoi son tour d’min, kissoi son signatir dsi in produi.

Alé ! Mi kite azot rofléshi ladsi é ni artrouv pli d’van, sipétadyé.

Justin