Konm si pou mwin néna i vé manz an goulipia, minm, i vé manz an voras sanm pou mwin. Pou kèl rézon mi di sa ? Dopi kéktan mi wa, néna i bouz, i tyinbo pi an plas. Poukoué toudinkou tousala ralé-pousé, tousala lanboulkidi ? I prétan kan néna larzan an poundiak, lé touzour konm sa. Konm dan la mèr, kan néna pou manzé, néna touzour rokin. In pé i di konm sa, pou rézon, vik néna larzan pou zèt a la mèr i tonm byin, avan sa na dévir in pé dann nout posh. Zot la konpri ousa néna larzan pou zèt a la mèr ? Koman fé pou pran ?

Mi souvyin, tam ti minm kan nou té vé sorti in pé èk bann kamarad, kiswa pou alé la fèt, kiswa pou alé sinéma, sinonsa foutbal, ou minm ryink pou ashté in sorbé, té falé domann lo dwa alé Papa èk Momon é sirtou té falé domann a zot in moné , so moman la té in traka pou nou. Sak fwa té réponn a nou : larzan la pwin, zot lé konm sa minm zot, zot i krwa i sifi lèv lo rosh pou trouv larzan dosou, Alé rod in travay pou zot fé plito é sort dovan mwin. Zot i wa in pé lo tablo.

Zordi mi wa konm si bann boug la rézyion èk bann transportèr i vé absoliman lèv lo rosh. Zot i krwa sé pou larzan ? Pou mwin, Papa èk Momon lavé rézon, lé pa kan i lèv lo rosh i gingn larzan, la ba Madégaskar lo rosh i kout pa shèr sé kan i ariv isi lo pri lé sho, é zot i koné poukoué lé pli sho isi ? A koz i fo travèrs la mèr, dopi Madégaskar ziska la rényion é dopi la ba ziskisi, si tou lo trazé, néna bonpé Rokin.A mwin, mwin na bo lèv lo rosh, mi trouv pa larzan !