Zordi, tout domoun nana in kont dann in bank. Si ou travay : dsi kont-la mèm, out patron va vèrs out moné. Mèm zafèr pou in sédik, lo RMI, larzann’lo tousala. Ou la pa bézoin déplasé pou pèy out loiyé, out lo, kouran, téléfone. Lé bien komod, mé tansion pangar si ou dépans plis sak ou gingn, out kont i pass dann rouz. Alor, lé riskab karsèr out larzan !

Bin kan sé in péï i dépans tro larzan, lé blizé an prété pou zoinn lé dé bout par l’milié, koman i éspas ? Tanpir lo tan i pass, tanpir li doi plis larzan. Ariv in zour i pé ète an faillite ? La pa lo ka pou La Frans, mé plis i sava, plis lo péï i doi. Si i kalkil sak lo péï i doi, par pèrsone, i trouv dizuit mil euro. Oté ! Sa i fé larzan oui, sa ! Koman i fé pou ranbours sa ?

I fo tir dan la posh sak nana pou ranbours sa, mé sak nana i èm pa péyé, i profèr gingn kado é pa arienk in pti moné siouplé. Pandan és’tan-la, lé blizé dépans larzan an plis, akoz i promète, i promète mèm. Alor, lo kont i sort rouz pal, talèr va vni rouz fonsé. La faillite i pé arivé san k’bann dirizan i konpran... An atandan : zordi i manz, domin sé nout zanfan va péyé, épi konm di kréol, kabri i manz salad.

Justin