Mé zami, zot i souvien Chikungounya ? Sa la fé déga sa, é pou sak i ansouvien sé in l’épidémi la dir in bon koup de tan é li la fé in bon kantité viktime. Astèr zot i koné la dengue é nout tout i koné maladi-la l’apré fé déga isi shé nou : i anparl pa tro, sansa pou mète la fote dsi nou pars ni néglij bann moustik i aport sa. Ala é toudinkou lo korona virus l’atak anou tou zazimite.

Lé vré pou dèrnyé maladi-la nou lé arienk dann lo komansman lo komansman é ni pé pa dir kansa li va mont pou trap son pik. Sof si li désite arète par li mèm, ni oi pa kisa isi, kèl sèrvis santé, lé kapab kal maladi-la.
Pou kosa mi fé pa banna konfyans ? Pars, sanm pou moin, mé mi pé tronpé lo bann gran kador k’i vien La Rényon, la plipar d’tan, sa in bann moun la pa invant la poud a kanon. Pou zot La Rényon i égzis dopi lo zour zot la poz zot pyé atèr isi, épi lé pli fasil pou zot mète l’otèr dsi nou ké dsi zot inkapasité pou trouv in bon solisyon pou in maladi.

An pliské sa, zot i vé gérir anou san nou, zot l’apré asplik anou i fo fé si, i fo fé sa, mé nou na poin lo bann zoutiy pou fé si é pou fé sa… Mi pé dir azot lo bann méyèr éspésyalis pou bate atèr in malédiksyon parèye sa lé pa isi shé nou, é mèm lé pa dan La fans laba. Alor, ousa zot i lé ?
Zot lé dan La chine sa lé sir, zot lé laba dann kuba sa lé sir galman, zot lé dann bann gran laboratoir privé mé banna l’apré solman shèrch in médikaman sansa in vaksin pou rapsol larzan demoun pa forséman pou géri-sa in bann kapitalis kant mèm. Alor, d’apré zot banna i sava trouv in tiktak pou arète la maladi shé nou ? Dabor La Rényon sé pa zot sousi. Sé la n’ote pars sé isi ké ni viv, é sa lé présyé pou nou.
Alor, sof si lo maladi i désid dégrenn par li mèm, mi oi pa banna kal sa par zot mèm. Mi oi pa zot gingn fé kékshoz konmsa - romark moin sré kontan tronpé mé mi mèt ar pa mon min dann fé.