Zot bann dirizan, bann moun anlèr, bann kapitalis, bann biznès-man, mi oi zot bien. Dann z’ot palé, dann z’ot l’avion, dann zot bato miliardèr, dann z’ot loto an nik, dann z’ot l’otèl kat-sink zétoil, mi oi zot bien. Dann z’ot kostar, z’ot rob la mark, z’ot koifir dantèl, épi z’ot san-bon, épi z’ot bijou, mi oi zot bien.

Konbien milion, konbien miliar zot i pèz an dolar, an lêro, an yen, sansa dan d’ot kalité larzan ? Zot lé an parmi d’moun konm zot mèm, zot lé bien, zot lé rish, z’ot vant lé plin. Zot lé éré, zot tout ansanm, i pé mèm di zot lé zoli.

Mé kan zot i mazine l’Irak, Haïti, lo Soudan, Madagaskar, la faim, la maladi, la guèr, koman i lé z’ot konsians ? Koman i lé ? Na in péi demoun i manz galète la bou, dann in n’ot, SIDA i tié par kantité, i koup la tète demoun i pik déssi klotir. Alor, kamarad rish ! Koman i lé ? Trankil ! Mi oi bien konm zot lé trankil.

Justin