Mon pti niès la di amoin k’li pran pi l’avion. Poitan, marmay-la i èm bouzé oui ! Kan li nana in moné, li pran l’avion, li vien piouk son famiy, épi fé provizion piman, boukané, sosis, épi la tizane li apèl tizane son momon. Toudinkou, moin la pans li té ragoulé avèk l’avion. Moin mèm i fé lontan moin lé plin èk sa !
Alor, mi domann ali si li la trouv in pié do blé la-ba (issi i apèl sa in pié do ri !) pou donn aèl lo pourkoi k’i mank aèl, sansa si èl la déside fé son ni l’ot koté la mèr. Mi domann aèl si èl la trouv in mouvman sérié... pars i fo rokonète son gou la pankor bien arété, alor èl i èm in pé lo shanjman : tazantan i oi aèl avèk in pti ra blan, tazantan èl i brat in kafé-o-lé, tazantan sé in malbaman na son favèr, alor mi pans so kou issi, èl la fine shoizir son shéri la krout définitif.
Èl i di amoin : « Tonton, arète gaspiyé ! ». Épi, èl i pran pi l’avion pou rézon k’la mète l’ékran lazèr, alor lo rokin shagrin k’i louk dann son lordinatèr, li oi aou, tou ni an vèr. Konmsa, si ou nana in trafikaz pou fèr, sansa in bonb pou fé éklaté, i ropèr aou toutsuit... mé i oi ou tou ni kan mèm... in pé i pé èm sa si sé z’ot désizion, bon pé i èm pa sa akoz sé konm si i viol azot. Oté, bann moun i trouv z’afèr konmsa, lé monstré oui ! Touléka, sa la pa in n’afèr pou fèr... mi oi pa sa konm in bon zafèr di tou ! Koman i èm éspione demoun don ?

Justin