L’èrla mi domande pou kossa i apèl sa konmsa. Pou koué black Friday pou so dèrnyé vantredi moi d’novanm. Pars zour-la té noir afors l’avé d’moune osinonsa in vilin sogré lé kashyète ladan ? Pars i paré dann tan lésklavaz laba dann l’amérik l’avé in zour téi solde bande zésklav é zour-la téi brade bande zésklav bann éspéssyalist la trète l’avé pa gingn ékoulé.

Méssyé Groguèl i di sa la pa konmsa é li akrosh ali avèk lésplikassion « noir avèk demoune ».Pou mwin lé tro bo pou ète vré é mi kontinyé panssé l’avé la dsou in linspirassion kaziman rassist mé lé vré mwin ossi mi gingn pa prouvé sak mwin l’apré afirmé.Mé mi panss m’a rodé , m’a rodé, é kan v’ariv l’ané proshène mi panss m’a nyabou dévoil la vérité.

Antouléka, sak lé sir sé ké lo black Friday,sa in manyèr pou foute anou d’dan, pou fé ashté anou bande zinitilité. Par l’fète zot i koné la métode bisou ? B konm bézwin,i konm immédia, s konm sanblab, o konm origine, u konm utile .Mézami sa i rézume bien lo sink késtyon i fo ni poze aou avan ashté kékshoz .

Fransh vérité, sa lé méyèr ké lo black Friday pars sète la i pouss aou pou ashté an kantité, san kalkilé.Bisou, sé amenn aou a poz sink késtyon pou pa gaspiye oute larzan.Konmsa mi konpran la vi.

A bon ékoutèr-salu