Koméla, nana tout sort zafèr pou manzé, pou boir, pou amizé, dann tan lontan, lavé poin. Alor, déssèrtin moun i pans i fo mète de koté sak lé ansien épi mète anlèr sak lé nouvo. Pa bézoin kroir bann moun i fé konmsa i vé pa le bien zot zanfan, zot famiy, mé zot i kroi pou vréman sé sak i fo fèr : borde in pé nout manzé tradission, nout boisson tradission, nout lamizman dann tan lontan. Zot i kroi pou vréman sé sak i fo fé.

Mi koné de moun i di souvan zot zanfan i èm pa patat, i manz pa maniok, lo kèr i shavir kan zot i santi in moun apré roussi lo grin, parl pi manz in fritir guèp, in sinp rougay mori, sansa in bout la mori griyé... dizon i vé fé mor azot ! Mé i prétan dir, bann zanfan i èm bien tout kalité manzé nouvèl, boisson nouvèl, lo zé k’i sort arivé - Akoz pa ? I pé s’fèr.
Bien sir, si in moun i di i fo artourn konm dann tan d’avan déssi la kèstionn boisson, la késtionn manzé, lamizman, domoun lé riskab ri azot pars sé konmsi zot i vé artourn dann tan la marine a voil.

Mon répons ? A vré dir, moin la poin in sèl répons ! Mi souète solman demoun lé rézonab. Konm mon granmèr té i di : « I fo manz, sansa boir sak lé bon pou la boush ! Sak lé bon pou lo kor ! Sak lé bon pou lo port-moné ! Amizé lé bon, mé an tro, la pa bon ! ».
Final de kont, mi pans in pé konm mon granmèr.

Justin