Alé konprann in n’afèr konmsa ! Alé konprann pou kossa, kant in n’afèr lé pa korèk, sé lo résponsab sèt’afèr-la k’i sava ésplinn é sé li k’lé riskab an avoir rézon : touléka mèm si li la poin rézon, tribinal i pé donn ali rézon.
Mi vé parl déssi zéléksyon Sin-Pol !

Kissa lété mèr ziska lané 2008 ? Sé méssyé Bénard, sa lé sir ! Kissa i roganiz zéléksyon dann la komine ? Sé lo mèr, sa ossi lé sir ! Si nana in kanikrosh dann la roganizasyon, kissa lé rèsponsab ? Sé lo mèr épi son bann dalon k’i antour ali, donkalor son ladministrasyon minisipal.
Kissa lé pli myé roprézanté dann biro d’vote ? Sé lo mèr-kandida, vik toute son ladministrasyon i apiy ali, i tir kart pou li, i fé toute sak i fo pou li gingn lo zak-pote, donk son post mèr.
Ki bate di bèr, i lish son doi ! Kart lé dann out min, sé ou k’i sèrv aou byin !

Tribinal administratif la trouv zéléksyon té pa régilyé par raport in pé signatir promyé tour lété pa konm sète dézyinm tour. Poitan, shakinn l’avé son kart lidantité, toulmoun la gingn vérifyé té le vré zéléktèr k’la voté. Zordi, lo raportèr Konsèy d’Éta, li ossi, li trouv a rodir é li domann k’i anil zéléksyon.
Ni koné pa sak Konsèy d’Éta, va désidé. Li pé pran in bon désizyon konm pa… Mé baz déssi bann signatir dmoun, dann in péi nana san-dis mil ilétré, mi pans lé in pé riské pou l’avnir !... Zot i kroi pa ?

Justin