Zot i souvien l’ané 2010 ? Sa in mové l’ané pou bann progrésis, in bon l’ané pou sak i profèr viv dann fénoir. L’ané-la, Paul vergès la pèrd la prézidans la réjyon é Didier Robert la rantré. Dann piramid tèt-an-ba, li la fé in diskour pou di son program !..dizon son kont-program vi k’li té i propoz fé lo kontrèr d’sak Vergès té apré fé. Rant son bann mézir li la déklar li sava bar shomin la MCUR. Tout in bann demoun shofé la bate la min é mi pans bann zipokrite la fé konmsi zot lété pou arien la-dan. Lo mèr Sin-Pol, dann tan-la, la di sa la pa son program é la pa dislkite la-dsi avèk èl...Moin pèrsonèl, moin la pans sa lété in l’atak an règ kont la kiltir progrésist, mé konm mi kont pou la po patat, sa té i fé pa arien pèrsone.

Mi sort lir dsi in blog, lo nouvo mèr Sin-Pol l’avé désid konsèrv lo nom Cimendef pou lo batiman l’apré fé dan la vil, mé la désid transform sa an magazin. Madam l’ansien mèr la komine, la mank toufé épi èl la déklar i donn pa lo nom in gran shèf marron in spès gran magazin. Moin la mèm lir in blog téi di konm sa ; :"Cimendef pardone azot, zot i koné pa sak zot i fé". Moin pèrsonèl mi pans pa i fo pardoné pars tout sak i atak la kiltir rényonèz i atak nout l’idantité, nout péi, i atak osi lo pèp rényoné. Pardone pa, mé lite kont sa pars sa sé in krime ni pé pa aksépté.Ankor in l’atak kont la kiltir ? Asé avèk sa !

Moin la antann osi in nouvo mèr, sète lo Port- in dalon l’ansien mérès sin-Pol,, apré di li la pa bézoin Zénith dann la komine toultan ké li sar lo mèr la komine i fèr ar pa in n’afèr konmsa.. Si sa la pa in l’atak kont la kiltir, sa i rosanm bien. Zénith téi doi fé inn Sin-Dni épi bann sosyalis la kass lo z’afèr. La komine lo Por la ropran program-la. Pars sa té i pran la suit in projé kominal pou in sal spéktak, épi té in bone afèr pars gouvèrnman té i pèy près tout. Kan ou i komans in manda par in l’atak kont la kiltir, sa la pa in bon sign ditou. Mi pans pa boug-la va port la komine Lo Por dsi son Zénith.

NB dé késtyon : Lo nouvo mèr, d’apré sak mi kroi,l’avé vote pou in sal spéktak kan lo projé té éné. Mèm, li té pa kont lo Zénith kan lo TCO la pran sa an sharj d’apré sak moin la tandi dir. Zordi li osi li atak la kiltir. Sa la pa in bon sign mi di azot. Par l’fèt, nana in térin kosté sanm lo térin pou fé lo Zénith. Moin la tandi dir té i doi fé in nouvo mcur la dsi. Sèt-la osi i fèr ar pa alor ? Rès pa dann fénoir don !

 Justin