Matant zélida la ékrir Justin :

Mon shèr nové, mon spès salté, rouj-de-fon dovan l’étèrnité,

vi koné bann la droit l’apré prépar in zéléksyon primèr-donk avan lo vré zéléksyon - po shoizi z’ot kandida pou port pou zéléksyon prézidan La Répiblik La frans. Aprésa i sava fé z’éléksyon primèr la gosh. Ou lé o kourann sa, mi sipoz ? O sinonsa vou va dir amoin sa i intérès pa zot ditou. Pétète ou i sava dir amoin bann valèr la droit, konm bann valèr la gosh sa i intérès pa zot. Mi domann amoin, si zot la bien konpri ké vote pou la droite, konm vote pou la gosh sé in profésyonn foi, konm de koi nou lé fransé épi ni antann nou va rès fransé… Si zot i obli in n’afèr konmsa, si zot i mète azot an déor d’tout mi pé dir azot ké z’ot i pran in shomin malizé : in shomin séparatis sanm pou moin é sa va kout azot pli shèr ké zot i kroi. Tok ! Pran sa pou toi !

Justin la fé pou répons :

Mon vyé matant k’i koz la boush rouvèr,

Mi pé dir aou ké mi partaz pa ditou out poinn vizé. Pou kosa ? Pars m’a dir aou, la gosh konm la droit, ni pratik azot dopi lontan. L’arivé ké nou la fé vot pou lo kandida la gosh kan son projé, solon nou, téi sava dann sans l’intéré bann rényoné. In l’égzanp, L’ané 1988, nou la domann vote Mitterrand pou bate la droite a-tèr pars èl téi rofiz anou l’égalité é té i ofèr anou l’inégalité sou lo nom la « parité ». Alé oir Mitterrand lété pou lo l’égalité.

L’ané 2012, nou la domann bann militan vote pou Hollande pars li l’avé promète dann son diskour Sin-Loui in bann projé-konm tramtrain épi d’ot-té i konvien anou bien. Pars plis 80 % bann rényoné té pou sa ! Aprésa, Hollande la obli anou san-pour-san é si promès sé dète, ébin li la pèye anou avèk shèk an boi. Li la pa réspèk la parol doné.

Alor, vi konpran, matant, sha éshodé la pèr l’o fré. Donk mi pans pa ni sava aksèp ankor in kou in moun i pèy anou avèk shèk an boi, mèm avèk la moné zako, mèm si solon moin sa lé pa réspéktyé pou Zako. Tok ! Pran sa pou ou !