Oté

Mi pans sa i fé parti lo prinsip la sékirité alimantèr

Justin / 9 zanvié 2020

JPEG - 43.6 ko

Na inn dé zour dann Témoignaz moin la lir képar dann l’afrik dé l’ouès in boulanjé i fé d’pain avèk moityé farine magnok-moityé la farine do blé, sansa moityé farine banane plantin-moityé farine lo blé. D’apré lo lartik moin la lir lo pain lé valab konm gou konm valèr lo zaliman épi èk sa avèk la valèr an suk. Pou la balans payeman lé bon galman.

Na inn dé zané moin la lir in n’ot lartik i di konm sa dann in péi i apèl Burkinafaso, i fé d’pain avèk moityé la farine lo blé, moityé la farine gro mil-i apèl osi sorgho. Sa lé bon pou banna, pou zot balans komèrsyal, ko nm pou zot valèr an sik-lé bon sirtou pou sak l’atrap la dyabète.

An parlan, ni koné galman néna bann produi konm magnok, patate, kanbar-i apèl dé foi igname-, sonz-i apèl galman taro - frui a pin, sa lé bon pou bann moun néna dyabète pars si ou i manz dopin la farine do blé in pé tro souvan ébin sa lé pa bon pou l’dyabète.

An touléka, ala in n’afèr intérésan sé d’fé do pin avèk d’ot farine ké lo blé sirtou kan ou i plant pal o blé, sirtou kan out popilasyon i manz plizanplis dopin pars i dovien in labitid sansa in mode. Pou moin sa sé in n’afèr intérésan pars sa i sava dann sans la sékirité alimantèr épi si ni vé osi nout loton omi dann l’ékonomi.