La Frans i viv a-krédi, konm in bonpé péi dan l’Erop. Toulézan i fo li anprète l’arzan pou joinn lé dé bout, par l’milyé. Toulézan i fo anprète in bon moné, é pèy lo z’intéré. Mi sort lir dann in zournal, sète ané, la Frans i sa va anprète mil sète san milyar l’ero. Konm di lo kont, l’arzan-la i trouv pa sa sou la pate shoval ! Zot i koné, souvan dé foi, l’intéré pou péyé sa lé in pé kosto. Kroi pa sa la pa séryé ! An kontrèr, sa in n’afèr pliské sérié ! I paré, in péi konm l’Itali, pars li doi mil ui san milyar l’éro, si son l’intéré i trap sète pour san, li fé défo. Donk li dépoz son bilan. Vantrodi dèrnyé, l’intéré son dète l’avé dépas sis sinkant... donk i san shofé pou li..
La Frans, ziska koméla, li nana in bon note, donk l’intéré lé pa tro shèr, mé dopi dé-troi somenn, lo péi lé sirvéyé é bann z’azans i ménas dégrade son note, donk son l’intéré pou anprété lé riskab goumanté é la sharj la dète lé riskab vni in pé tro lour. Donk lo pti prézidan li vé gard lo 3XA. Mé lé pa sir li v’arivé. L’èr-la, son sèl téknik sé l’ostérité. Na dé troi moi, la raz la pint bann nish fiskal pou douz milyar l’ero. Konm i sifi pa, so kou isi, li sava rode ankor l’arzan dan la posh bann Fransé : i paré i fo ali uit milyar l’éro pars i baz dési in kroisans in pou san. Kaziman kroisans zéro, pou l’ané 2012.
Konm li vé pa tir tro dan la posh bann rish, ala kosa li vé fé : fé in dézyèm zourné solidarité. In zourné travay pou la po patate é ou i gingn pa in grin la-dan. Déza promyé zourné pou bann vyé pèrsone la fé grongn demoun. Arzout èk sa va goumant TVA, donk la vi va anshéri, é pou fé pass in posyon amèr, va mète in taks dsi bann gran sosyété. Mi éspèr la pa pou fé sanblan, mé èk banna, na poin arien lé sir.
Lo problèm pli grav, sé ké son zès lé pa fini, é ni pé atann shak tanzantan in tour d’vis an plis èk in posh plizanpli plate pou nou, in vi plizanpli shèr, in nivo d’vi pir-an-pir. Li mèm li koné pa kansa, ousa li v’arété... donk mi pé dir azot nout kanar lé noir.

Justin