Oté

Mi pé dir banna lété épi lé ankor patriyot dann in tan nout dignité pyétiné

Justin / 14 out 2019

JPEG - 43.6 ko

Médam, mésyé, la sosyété, si mi arparl azot zordi ankor in n’afèr moin la fine parl pa arienk in kou, sé pars sa lé inportan pou moin, é mi pans sa lé inportan galman pou zot, konm pou in bonpé d’moun.. . Somenn pasé dann in kozman moin téi domann amoin dann fon d’mon kèr, si, anparmi bann rézon, nou la pa gingn la parti konm k’i fo, lété pa pars nout patriotism té in pé tro tyède. Moin té apré di sa, kan moin té apré poz amoin késtyon pou konète pou kosa nou la pa gingn anpèsh léskandal bann zanfan La Kreuz lété viktime isi shé nou La Rényon épi lab dann péi d’fré.

Mon bann dalone, mon bann dalon, in patriotism tyède sé konmsi li égzis pa pars lo patriotism sé in santiman brilan. Konpran amoin bien moin lé zis apré dir azot i pé pa ème son péi in pti pé. Soi ou i yèm ali, soi ou i yème pa li. Si ou i préfèr lindèks koréksyon plito ké out péi, donk ou i yèm pa out péi. Si ou i profèr out ka pèrsonèl plito ké out péi sa i vé dir ou i yèm pa out péi pou vréman - kon m Jc téi di avèk sin-Pyèr : « Kok sar pankor fine shant troi foi, ou nora fine trayir amoin ».

Dann mon vi moin la konète demoun téi yèm zot péi pou vréman pars zot téi yèm lo moun i viv dann péi-la, é anparmi, lo moun i soufèr pliské lé zot par raport in sityasion konm sak nou la konète, dann nout pasé épi ni koné ankor zordi. Nou lé éné d’in krime de mass kont l’imanité kisoi la trète bann noir, kisoi lésklavaz ! Nou la konète l’angazis. Pizapré nou la konète lo kolonyalism épi lésploitasyon-bann zantiyé i apèl sa la profitasyon. Nou la konète la frode dann zélékssyon épi la réprésyon kas an fèr épi nèrvis… épi zordi la dignité pyétiné bann rényoné.

Moin la konète é mi koné ankor demoun la amène - é i amene ankor zordi - la lite kont lésploitasyon kont la dominasyon, é kont tout sak i fé k’zordi nout péi épi in bonpé anparmi bann rényoné la pankor shapé d’la mizèr - in sistèm la lèss in bonpé dmoun dsi l’bor shomin-plito dan la kivète. Moin l’avé la shans kotoiye bann moun konmsa avèk in bèl kèr pou zot péi. Banna lété é pou inpé lé touzour bon koté listoir La Rényon é, pou mon par, mi romèrsyé la vi pars moin la konète azot épi zot parkour dan sèrvis pou nout péi.
D’apré zot mi pé apèl banna patriyot ? Mi pé di zot lété é zot lé ankor zordi patriyot dann in tan nout dignité pyétiné ? Mi pans oui.