Dsi kossa é dann kossa mi vé mète mon dé grinnsèl d’apré zot ? Dsi lo gran sobatkoze demoune l’apré fé : dsi lo vakssinassion obligatoir, dsi lo pass é toute lo tintouin, si lo danzé a vaksiné, é dsi léfikassité pou ète vaksiné. Etsétéra la ké lo ra.

Promyé késtyon é promyé réponss : zot i pé dmande amwin si mwin la vaksiné konte lo kovid. Mon réponss sé oui. Dézyème késtyon é dézyème réponss : astèr zot i pé dmande amwin pou kossa ? Mon réponss, mwin la fé pars momandoné téi di si i vaksine lé possib pa gingn bande form grav la maladi si i gingn lo maladi. Troizyème késtyon : si mi kroi san pour san mon rézon sé in bon rézon. Mon réponss : mi panss pa san pour san ziss in pti guine. Sirtou dopi bande varyan la pass a l’atak : l’èrla mwin lé ankor moin sir !

Aprésa ni pé poze in séri késtyon-réponss : lé valabe vaksiné pou alé krazé dann salon bal, sansa alé oir fime osinonsa bate in voiyaz lagréman laba dann la mértropol, rante dann bar pou boir in mantalo, avèye téate. Mon réponss pèrsonèl : sa la pa bande répons i bote amwin sirtou si mi panss aprésa viris va fé kass kou dann mon bande sélil konm i pé i di…

In ote késtyon : si mi panss i fo zénéraliz bann roshèrch pou oir si vaksiné lé éfikass é si vaksiné la pa danzéré é si lé pa riskab andikape lavnir limanité. Mi panss i fo fé réèlman pars si i apran dé shoz mi fé konfyanss bande savan-pa bande bézèr d’zèf o la – pou pran lo dovan.

Mézami, ala mon grinnsèl dan l’afèr é mi azoute ziss i vo myé adrèss lo kèr d’moune épi lintélizanss plito k’la pèr é l’intéré.