Kan mi di Madégaskar sé i gran péi, mi vé dir, par son zéografi fizik li lé pli gran ké La Franss, li sré mèm gran konm La Franss adissyoné avèk La Belgique… Mi panss galman son pèp zordi lé nonbré — 29 milyon d’moune — é plizanpliss nou va avanss dann vintéinyèm syèk… anplisské sa li lé pa tro loin par rapor anou, par rapor la Répiblik Maurice, pa tro loin bannzil Sésèl épi bannzil komor. Arzoute èk sa li lé pa tro loin par rapor bann gran péi l’Afrik de l’est.

Si mi di sa, lé possib in pé lé kapab dir : « Mé pou kossa wi sava poz aou késtyon ? Vi k’noute déstin l’amenn anou a déssote nout lanvironeman pou nou lanss in pon avèk La Franss épi l’Érop é na poin arien pou dékouraz anou pou kontinyé dann l’avnir konm nou la fé(?) dann passé é pou noute méyèr possib. » Konm i di : kissa i tape anou la !

Mézami nou lé pa jéné kan ni di zafèr konmsa ? Koman ni pé souète d’ète dann in landroi losséan indien épi prèss dévir lo do avèk noute bann voizinaz. Lé pa pli natirèl intérèss anou avèk noute bann voizin é si néna in l’avnir pou fèr, akoz pa avèk noute voizin plito ké tourn azot lo do. Si listoir l’amenn anou konm ni lé zordi akoz pa panss kékshoz diféran pou l’avnir.

Zot i panss pa, pou domin, i fo ni rode in shomin pou nou inplante anou in pé myé dann landroi la zéografi la instal anou, dann losséan indien épi dann lanvironeman mwin la fine anparl talèr-la. In pé i parl l’indianosséani, d’ote i panss bann trété i égziss déza, é d’ote va ariv firamézir… Mé si ni vé, i vé pa dir nou va gagné. Ni fé lo ni, sa lé vré, mé sé La Franss k’i ponde son zèf dodan konm la fé avèk la COI.

Mi poz amwin késtyon, souvan dé foi, san trouv la solission k’i konvien anou.

A bon antandèr, salu !

Justin