Sinploman pou rakonte azot in zistoir vré :

Donk in bande plantèr kann, in zour la désside, zoinde toute zot kamarade pou di alon fé in l’antropriz. Shakinn rantre nou va kontinyé plante kann, mé va plante dé-san mète karé dori pou lotosifizans zot famiye. Par-la dé san plantèr lété dakor : paré pou planté, paré pou rékolté, paré pou tir la kok dossi é pou blanshi.

Sa la pass dan la prèss épi bien antandi bande zinportatèr dori la konprande l’afèr ; sito di, sito fé lo pri dori la béssé a la vante ; li la tonb ziska 1 € lo kilo… L’èr-la in bonpé plantèr la désside arète lo léspèryanss. Si tèlman k’in pé la plante dori, la bien poussé épi zot la gingn assé pou zot famiye mé konm zot i konpran léspèryans lété pa ossi valab kél’avé prévi.

Ala mon késtyon ? Kissa rante zot noré la solissyon pou anpèsh lo dumping dsu lo ri ? Kissa rantre zot dann léstatu aktyèl l’avé la solissyon politik épi ziridik pou amenn léspèryanss o bite. Mwin pèrsonèlman mwin na poin, mé si in pé néna la solissyon zot i pé done sa bande plantèr é mi panss sèryèzman zot nora été paré pou rokomanssé.

Astèr mi pé dir azot in n’ote afèr. Sa la éspass dann tan mwin lété étidyan é in zour mwin la parti suiv pou Témoignages in léspèryanss plantassyon pistash avèk la mashine pou fé doluil ; biensir lo luil téi doi fé Sin-Pyèr é lo pistash planté La Rényon.

Sak mi rapèl sé k’lo pri doluil la béssé é lo bande moune téi vé fé doluil La Rényon la rononssé. Dann tan-la l’avé poin la réjyonalizassion é bonpé rante nou téi sobate pou lotonomi. Léspèryanss la foiré pars léta épi bande kontoir kolonyal lété déssidé anpèsh dévlope lo péi kansréti in pti pé.

Mi panss kan la kamarade la di amwin - mardi dèrnyé — léta i vé pa k’i dévlope La Rényon, èl l’avé rézon é sa i dir dopi lo tan Colbert, dopi 17eme syèk.

A bon ékoutèr salu.

Justin