Oté

Mi rossan mwin néna konm in bra kassé, é mwin lé a d’mandé si nou lé adilt oui sansa non !

Justin / 23 mars 2021

JPEG - 43.6 ko

Mézami, m’a dir azot in n’afèr : pou mwin lé inportan, mi koné pa pou zot mé mi panss zot ossi i doi santir in kékshoz konmsa. Kossa i lé ? Kan i ariv in pèryode la kriz, In l’inpréssyon ou néna konm in bra kassé. In linprèssyon ou la pa moyin fé kékshoz bien pou tir aou é lé zot an mèm tan dann traka.

Déssèrtin lé riskab majiné sé in n’afèr mi rossan zordi solman. Poitan mi rossan ali dopi in bonpé d’tan-dopi lo zour moin la konpri lotonomi mwin épi d’ote, nou téi vé dopi nout jenn tan, lété romi dann kalade grèk, pou ète ranplassé par sak i apèl la désantralizasyon. Lotonomi, lété pou mwin in fasson diriz lé zafèr intèryèr noute péi san mèl avèk bann zafèr l’éta é san ké l’éta i mète son kiyèr sal-épi inpuissan - dann in marmite i kui pa po li.

Lo tan la passé, ni koné bann limite la désantralizassyon é sirtou ni koné kossa sanm pou mwin-téi fo fé pou nou rényoné, pou li La Rényon - pou sirmonte la kriz kovid, konm toute lé z’ot kriz nou la konète dopi in takon d’zané… Zot i koné afors ékoute lo l’éta lokal épi son bann manèv rakonte anou midi a katorzèr, mwin néna plizanplis linpréssyon i mank amwin, konm toute mon bann konpatriyoterényoné, in bra. I diré noute toute lé valide (i fo lir invalide)

Mi panss nou lé rabèssé, nou na poin lo droi déside lo minimome sak i konvien anou, bann moun déor i déside pou nou, é anpliss mi oi zot souvan défoi konm in minorité l’apré trète anou an foutan... zot va dir amwin sé la lojik la désantralizasyon. Zot va dir amwin l’éta i konsan lèss anou in karo pou nou pran noute désizyon, mé sé in lojik i plé pa mwin é plizanplis li plé pa mwin pars sak mi vé-é pétète in bon pé i vé-sé pran bann désizyon inportan donk marsh dossi noute majorité. Nou lé adilt sansa nou lé pa ?
Ala in vré késtyon solon mwin.

Mézami, dann tan Paul Vergès téi fé pa lé shoz konmsa pars sansa noré antand ali, mé lé zot résponsab lo dé kolèktivité, sof mon réspé, sanm pou mwin, mèm dann i n pèryode kriz, zot i rèst konm martin ki kouzi.