Oté

Mi sava pa tourn manzé in moun avèk mon kiyèr sal, sirtou kan manzé i kui pa pou moin !

Justin / 12 désanm 2017

JPEG - 43.6 ko

So matin, moin la antann in gran sobatkoz dann radyo. Demoun la kozé, la kozé, la kozé. Baya ! Mi di dann mon kèr, i fo kroir i doi z’ète in kékshoz konsékan vi lo watiwatia, tout bann sobatkozèr. Kaziman, sanm pou moin, in késtyon do vi ou d’mor, an touléka pou la Répiblik fransèz.

A bien ékouté, moin la fini par konprann téi parl l’arb dé noèl dann l’ékol. Moin nora profèr té apré diskite dési vin désanm épi l’abolisyon lésklavaz, mé lété arienk sak moin la di azot an o la. Pou kosa mi di sa ? Pars konm zot i koné sète ané bann gran vakans i komans 23 désanm, donk apré lo vin, pou pèrmète d’apré sak mésyé lo réktèr i di, bann marmaye pou arfléshir in pé dsi nout pasé d’in zil la konète lésklavaz plis la moityé son l’istoir.

Donk lo sobatkoz téi port pad si vin désanm mé dsi l’arb noèl. Pou kosa sa ? Pars d’apré sak zot i koné nout lékol lé layik, donk i fo pa mélanz la rolizyon avèk La Répiblik. Donk, pou désèrtin i fo pa monte in l’arb noèl dann la kour l’ékol, dsou lo préo si zot i vé. Mé, moin lé a d’mandé kosa l’arb noèl nana pou oir avèk la rolijyon. Moin la bo rouv mon mon dé kanète lo zyé é mi oi pa.

A ! Si l’avé mont in krèsh konm lo lyé dnésans l’anfan Zézi d’apré sak i di dann nouvo téstaman. Mi di pa ! Sa sé in n’afèr lé rolizyé toulbon, mé in pyé d’boi avèk in bonpé dékorasyon dsi ? Mi oi pa kok sa nana d’rolijyé... In pé i di sa lé rolijyé. D’ot i di, sa sé in n’afèr i kol pa. Lo moun konm moin, i konpran pa granshoz i konpran pa non pli pou kosa nana in pèl mélaz konmsa dann sète afèr la. Sof pétète pou détourn l’éspri d’moun par raport édé z’afèr pli konsékan…

Lé vré si i parl Noël, in pé i pé dir i parl la rolijyon mé noël li mèm li té in fète payène si mi tronp pa ébin payin la pa krétien, é si sé konmsa mi oi pa pou kosa lo séparasyon l’égliz avèk l’éta i vien fé la dan... Anfin, m’a dir azot, moin pèrsonèl sa i fé pa moin ni sho, ni fré, i fé pa tonm la plui, é i fé pa bril mon po par solèye. An kat ti mo, la pa moin k’i sava tourn marmite in moun avèk mon kiyèr sal sirtou kan manzé i kui pa pou moin.