Mé zami, zot i koné, i ariv parfoi ou i tourn in kou out tète pou oir kosa néna déyèr ou. La pa toultan biensir, mé i ariv kant mèm, é kan sa i ariv, si ou lé pa sifizaman vizilan néna dé shoz i vo la pène ou i rann aou kont ou la pa fé in kont konm k’i fo avèk. Sof si ou l’avé in bon koud ‘shans… Nout kou d’shans isi La Rényon lété pandan lontan parti kominis rényoné. Sé li k’la amontr anou souvan dé foi rogard la vérité an fas. Pars sa la pa kékshoz sinp, épir k’sa é san fèr éspré ou i tonm dann déni - ou i oz mèm pa di sak ou la vi, sak ou la rann aou kont par ou mèm. Déni ? Sa i vé dir néna dé shoz lé pa agréab ditou, ou i dovré dénonsé, é ou i fé konmsi ou la pa vu.

Kan mi di sa, mi pans tout sak l’ariv isi dann loséan indien é la plipar rant nou la aksépté, san fèr sak nou noré du fèr.. san dénonsé. Mèm si nou l’avé la shans an avoir in gard-fou é si gard-fou. Moin la fine rakont in zistoir : sa téi éspas kan moin l’avé moins dizan. In marmaye mon vilaz l’avé parti fé la guèr Madégaskar. Kan li ariv li vien rann in vizite son lansien métrèss lékol. Li rakont sak li la fé dann gran péi-la é lété pa joili-joli. L’èrla linstititris i domann ali : « Sé sa moin la amontr aou lékol ? ». In sinp késtyon, mé sa téi vé dir la konvèrsasyon té tèrminé.

Aprésa, dann bitasyon, moin la antann bann zoinalyé apré rakont z’ot forfé : zistoir bril bann vyé malgash avèk sigarète alimé, zistoir lans bann robèl dopi an l’èr l’aviyon ziska loséan indien, épi tout la salté in guèr kolonyal… Mé zami, si mi di azot sa, sé ké mon famiy lété militan é mi pans kan zot té i sava komité santral zot téi antann parl tousala. Mé mi doi dir, moin téi antann tousala konm dann in rèv évéyé - moin lété pa vréman konsyan. Mi rokoné d’ot lété bonpé pli konsyan ké moin é mi rogrète bien moin la pa prann in pli gran par résponsabilité.

Moin la aprann aprésa bann nom bann rényoné sélèb konm Fransis Sautron, konm Louis Leichnig, konm d’ot ankor la mèm mète zot vi an danzé pou sokour zot frèr malgash. Konm lété dann la klandéstinité, sak zot la fé nou la aprann domi-domi solman é bien pli tar.. Zordi mi aplodi dé min sak l’apré sèye ramar bann gatir kasé la solidarité rant pèp é mi souète zot va rogingn ramaré : in gran dovoir, in gran misyon pou bann militan nout péi.