La koup la fini. Bann plantèr i koné kèl déga siklone Gamède la fé dann z’ot plantasion kane. Donkalor, zot i koné sèt ané z’ot porte-fèy sar in pé pli plate ké lané dèrnièr. Mi kroi pa la bank i sar déroul tapi rouz kan zot v’arivé : konbien i sava an prète larzan dann dé-troi zour ? Konbien i sava kontinié, par l’fèt, manz-o-pié konm zot la fini pran labitid.

Zorié larzan, konm demoun i kroi nana, i trouv ar pa sa dan la kaz bann dalon plantèr. La fini lo tan bann téi mète in bouké flèr dsi z’ot dèrnié kamion sansa sharète kane, konm in manièr fé la fète, apré an avoir travay dur pandan kat-sink moi. Konm in manièr fé oir toulmoun, i sava pèy krédi la boutik, i sava ashté linz pou marmay, la-dsi mèm va tir in plézir pou la famiy.

Tan-la la fini. Fini galman lo tan Maksime téi shante : « Donn dé sik, toué nora do ri ; donn lo ronm toué nora tissi ; donn lésans zéranionm, kan sa va rotourn issi sar médikaman ». Oui, tan-la lé fini, mé lo tan kane, lo tan dolo dobout : I bouz ankor, non ?

Justin